"Пахтакор" футбол академияси тарбияланувчиси Темур Ҳакимов якунига етган ўсмирлар ўртасидаги Осиё чемпионатининг энг яхши футболчиси деб топилди.

Ўзбекистон терма жамоаси билан финалгача етиб борган Ҳакимов рақиблар дарвозасини беш марта ишғол қилди. У Индонезия, Тожикистон ва Сурия терма жамоаларига қарши кечган беллашувларда гол уриб, ўсмирларимизнинг жаҳон чемпионати йўлланмасини қўлга киритиши ва кумуш медалларга сазовор бўлишида ўзининг катта ҳиссасини қўшди. Финал ўйинидан кейин ўтказилган тақдирлаш маросимида Темур Ҳакимовга Осиё чемпионатининг энг яхши футболчисига аталган махсус соврин топширилди. Биз ушбу муваффақият билан футболчи, унинг яқинлари ва мураббийларини табриклаймиз. Умид қиламизки, ушбу соврин Темурнинг фаолиятига янада ижобий таъсир кўрсатади ҳамда ёш ҳужумчимиз Мексикадаги жаҳон чемпионатида ҳам терма жамоа шарафини муносиб ҳимоя қилади.